24 shkurt 2015
Në ambientet e garnizonit “Skënderbej”, ka filluar procesi i testimit të kandidatëve për t’iu bashkuar trupës së nënoficerëve të Forcave të Armatosura. Testimi i kandidatëve të rinj u ndoq nga afër nga shefi i Shtabit të Përgjithshëm të FA gjeneralmajor Jeronim Bazo.
Gjeneralmajor Bazo e vlerësoi moment shumë të rëndësishëm procesin e testimit në karrierën ushtarake, duke u shprehur se:” Procesi që po merrni pjesë ka si qëllim testimin e aftësive tuaja fizike dhe intelektuale që të sigurohemi se më të mirët prej jush do të kenë mundësinë të bëhen liderët e ardhshëm në radhët e nënoficerëve. Me ligjin e ri të karrierës në FA, karriera e nënoficerit të FA menaxhohet njësoj si ajo e oficerit dhe ju do jeni shembulli për pjesën tjetër të trupës që do të jenë nën komandën tuaj.”
20 shkurt 2015
Është zhvilluar sot në batalionin e Forcave Speciale, ceremonia përkujtimore e me rastin e 3-vjetorit të rënies në krye të detyrës të “Dëshmorit të Atdheut”, kapiten Feti Vogli. Të pranishëm në këtë ceremoni ishin ministrja e Mbrojtjes, znj. Mimi Kodheli, shefi i Shtabit të Përgjithshëm të FA, gjeneralmajor Jeronim Bazo, komandanti i Forcës Tokësore, gjeneralmajor Zyber Dushku, familjarë të “Dëshmorit të Atdheut”, kapiten Feti Vogli, si dhe miq dhe kolegë.
12 shkurt 2015
Është zhvilluar sot, në ambientet e Batalionit “Komando” në Zall-Herr, ceremonia e përfundimit të kursit të 10-të “Komando”. Në ceremoninë e rastit merrnin pjesë shefi i Shtabit të Përgjithshëm të Forcave të Armatosura, gjeneralmajor Jeronim Bazo, komandanti i Forcës Tokësore, gjeneralmajor Zyber Dushku, atasheu ushtarak i Republikës së Turqisë në vendin tonë, kolonel Nizmetin Dogar, drejtorë drejtorish në Shtabin e Përgjithshëm të FA, komandantë njësish, etj.
09 shkurt 2015
Shefi i Shtabit të Përgjithshëm të Forcave të Armatosura, gjeneralmajor Jeronim Bazo ka pritur në një takim të veçantë efektivët e Forcës së Sigurisë së Kosovës, të cilët u angazhuan në operacionet në ndihmë të popullsisë, si pasojë e situatës së rënduar atmosferike të ditëve të fundit.
Gjeneralmajor Bazo falenderoi efektivët e Forcave të Sigurisë së Kosovës, të cilët për një periudhë disaditore u angazhuan në operacione në ndihmë të popullsisë në rajonin perëndimor dhe jugperëndimor të Shqipërisë.
06 shkurt 2015
Në kuadër të bashkëpunimit në fushën e mbrojtjes ndërmjet vendit tonë dhe Turqisë, është zhvilluar së fundmi vizita e 57 ushtarakëve të Kursit të Komandës dhe Shtabit në Akademinë e Luftës së Forcave Ajrore të Republikës Turke, kryesuar nga komandanti i kësaj akademie, gjeneralmajor Rexhep Yuksel
Ditën e sotme, një përfaqësi e ushtarakëve të Kursit të Komandës dhe Shtabit të Akademisë së Luftës të Forcave Ajrore Turke, kryesuar nga gjeneralmajor Rexhep Yuksel zhvilloi një takim me shefin e Shtabit të Përgjithshëm të FA gjeneralmajor Jeronim Bazo.
01 shkurt 2015
Situata meteorologjike e rënduar, sidomos në disa zona në jug të vendit ka vënë në rrezik jetën dhe pronën e qytetarëve. Komunitetit të rrezikuar nga këto reshje i është ofruar ndihmë e mbështetje edhe nga Forcat e Armatosura. Trupa dhe mjete të njësive të Forcave të Armatosura më afër këtyre zonave të rrezikuara i janë bashkuar përpjekjeve për të parandaluar humbjen e jetëve njerëzore dhe për të pakësuar humbjet materiale.
Në orët e para të ditës së sotme edhe Forca Ajrore është bërë pjesë e operacionit në ndihmë të komuniteteve të rrezikuara nga përmbytjet. Një helikopter i kësaj force ka kryer me sukses operacionin për shpëtimin e jetës së një qytetari të bllokuar në çatinë e një ndërtese, pa rrugëdalje për shkak të vërshimit të ujit.
