28 shkurt 2013
Sot paradite, shefi i Shtabit të Përgjithshëm i FARSH, gjeneralmajor Xhemal Gjunkshi , kreu homazhe në nderim të Dëshmorëve të Atdheut, Lekë Qokaj dhe Besnik Hidri, ish-ushtarakë të SHISH të rënë në krye të detyrës, të cilët do të rivarrosen në Varrezat e Dëshmorëve të Atdheut në Tiranë.
Në ceremoninë e organizuar në mjediset e Qendrës së Kulturës, Medias dhe Botimeve të Mbrojtjes, kanë kryer homazhe në nderim të Dëshmorëve të Atdheut, Lekë Qokaj dhe Besnik Hidri, kryeministri i Shqipërisë z. Sali Berisha, ministri i Brendshëm z. Flamur Noka, zëvendësministri i Mbrojtjes z. Ekrem Spahiu , zëvendësministrja e Mbrojtjes znj. Arta Musaraj dhe personalitete të larta të shtetit, etj.
26 shkurt 2013
Sot pasdite, me kërkesë të Drejtorisë së Përgjithshme të Emergjencave Civile, shefi i Shtabit të Përgjithshëm i FA, gjeneralmajor Xhemal Gjunkshi, ka urdhëruar vënien në dispozicion të komunës Qendër, Mallakastër të dy mjeteve të tonazhit të rëndë, për t’iu ardhur në ndihmë banorëve të cilët kanë humbur shtëpitë e tyre si pasojë e rrëshqitjes masive të tokës.
Mjetet janë angazhuar për transportimin e materialeve dhe orendive shtëpiake të 15 familjeve që kanë humbur shtëpitë e tyre. Si gjithmonë edhe në këtë rast angazhimi i strukturave të Forcave të Armatosura ka qenë i menjëhershëm.
26 shkurt 2013
Shefi i Shtabit të Përgjithshëm i FARSH, gjeneralmajor Xhemal Gjunkshi priti në Shtabin e Përgjithshëm në një takim të veçantë shefin e Shtabit të Forcave të Armatosura të Greqisë, gjeneral Mikhail Kostarakos dhe delegacionin që e shoqëronte. Pas pritjes ceremoniale të dy delegacionet zhvilluan bisedime për çështje me interes reciprok, që përfshinë çështje në marrëdhëniet bilaterale në kuadër rajonal dhe atë të Aleancës.
25 shkurt 2013
Sot paradite, ministri i Mbrojtjes z. Arben Imami dhe shefi i Shtabit të Përgjithshëm i Forcave të Armatosura të Republikës së Shqipërisë, gjeneralmajor Xhemal Gjunkshi, kanë kryer homazhe para trupit të pajetë të kryekomisar Dritan Lamaj mbuluar me Flamurin tonë Kombëtar.
Në ceremoninë e organizuar në mjediset e Qendrës së Kulturës, Medias dhe Botimeve të Mbrojtjes me rastin e përcjelljes për në banesën e fundit, kanë kryer homazhe kryeministri i Shqipërisë z. Sali Berisha, ministri i Brendshëm z. Flamur Noka, zëvendësministri i Brendshëm z. Arben Ristani , Drejtori i Përgjithshëm i Policisë së Shtetit z. Hysni Burgaj, kryebashkiaku z.Lulzim Basha, kryetar partish dhe politikanë, etj.
22 shkurt 2013
Sot, në orët e para të mëngjesit u kthye në atdhe kontigjenti “EAGLE-5”, i përbërë nga 45 ushtarakë të Batalionit të Forcës Speciale. Trupat u pritën në Aeroportin e Rinasit nga Shefi i Shtabit të Përgjithshëm të FARSH-së Gjeneral Major Xhemal Gjunkshi, i cili shoqërohej nga Komandanti i Forcës Tokësore Gjeneral Major Zyber Dushku, si dhe ushtarakë të lartë të Forcave të Armatosura. Kishin ardhur për të pritur misionarët edhe familjarë dhe të afërm të paqeruajtësve.
21 shkurt 2013
Në ambientet e Komandës së Doktrinës dhe Stërvitjes u zhvillua sot ceremonia përmbyllëse e seminarit ndërkombëtar “Cyber Endeavor” (CyE), me pjesëmarrjen e përfaqësuesve nga 13 vende të NATO dhe PfP (Austria, Polonia, Holanda, Turqia, Bullgaria, Rumania, Norvegjia, Lituania, Mali i Zi, Maqedonia, Armenia, Spanja, Moldavia), si dhe përfaqësues nga institucionet shtetërore të sigurisë si SHISH, DSIK, AKSHI, etj.
Qëllimi i seminarit, i cili i ka filluar punimet prej datës 11 shkurt, është rritja e bashkëpunimit të mëtejshëm mes forcave të Aleancës së Atlantikut të Veriut dhe vendeve të Partneritetit për Paqe (PfP). Seminari organizohet dhe drejtohet në bashkëpunim me Komandën Amerikane në Evropë (USEUCOM) përfaqësues të fushës së sigurisë së Informacionit të Gardës së New Jersey.
