17 shkurt 2013
Me ftesë të presidentes së Republikës së Kosovës, Atifete Jahjaga, shefi i Shtabit të Përgjithshëm të FARSH gjeneralmajor Xhemal Gjunkshi mori pjesë në festimet e 5-vjetorit të Pavarësisë së Republikës së Kosovës. Në këtë ceremoni solemne morën pjesë presidentja e Republikës së Kosovës znj. Atifete Jahjaga, kryeparlamentari z. Jakup Krasniqi, kryeministri i Kosovës Hashim Thaci, presidenti i Republikës së Shqipërisë z. Bujar Nishani, kreyparlamentarja e Shqipërisë znj. Jozefina Topalli, ministri i Mbrojtjes së Shqipërisë z. Arben Imami, ministri i Mbrojtjes së Maqedonisë, z.Fatmir Besimi, shefi i Shtabit të Përgjithshëm të FARSH, gjeneralmajor Xhemal Gjunkshi, ministri i FSK z. Agim Çeku, komandanti i FSK, gjeneral lejtnant Kadri Kastrati , personalitete të tjera politike të larta nga Kosova por edhe qytetarë të shumtë nga e gjithë Kosova si dhe ambasadorë dhe atashe të akredituar në Prishtinë.
15 shkurt 2013
Shefi i Shtabit të Përgjithshëm të FA, gjeneralmajor Xhemal Gjunkshi priti sot paradite në një takim të veçantë, gjeneral brigade Salvatore Farina, shef i Departamentit të Planifikimit dhe Politikave Ushtarake në Shtabin e Përgjithshëm të FA italiane, i cili në krye të një delegacioni ushtarak po zhvillon një vizitë pune në Ministrinë e Mbrojtjes në kuadër të finalizimit të planit të bashkëpunimit ndërmjet dy vendeve tona për vitin 2013.
Gjeneralmajor Gjunkshi pasi vlerësoi marrëdhëniet e shkëlqyera të bashkëpunimit në fushën e mbrojtjes ndërmjet Shqipërisë dhe Italisë, njohu gjeneral Farina me zhvillimet më të fundit në Forcat e Armatosura e më konkretisht me ecurinë e procesit të Rishikimit Strategjik të Mbrojtjes, nevojën e rritjes dhe forcimit të bashkëpunimit rajonal si dhe rëndësinë që ka procesi i edukimit dhe trajnimit të ushtarakëve shqiptarë, etj.
13 shkurt 2013
Komandanti i Brigadës së Mbështetjes Rajonale (BrMR), gjeneral brigade Abaz Lleshi ka pritur paraditen e sotme një delegacion ushtarak të Gardës Kombëtare të New Jersey, kryesuar nga nënkolonel Daniel Mahon.
Qëllimi i kësaj vizite ishte vlerësimi i bashkëpunimit në drejtim të kapaciteteve dhe aftësive të BrMR, progresi i bërë në fushën logjistike gjatë vitit 2012 si dhe dhënia e rekomandimeve në lidhje me përmirësimin e procesit të menaxhimit dhe dokumentimin e vlerave materiale.
13 shkurt 2013
Në vijimësi të punës përgatitore të Iniciativës së Shefave të Shtabit të Përgjithshëm të FA të vendeve të Ballkanit, u zhvillua sot paradite takimi i dytë i grupit koordinator, me pjesëmarrjen e përfaqësuesve ushtarakë nga Bosnje-Hercegovina, Bullgaria, Greqia, Maqedonia, Mali i Zi, Serbia, Turqia dhe Rumania. Takimi u drejtua nga kolonel Nazmi Cahani, drejtor i Drejtorisë së Planifikimit dhe Monitorimit të Mbrojtjes.
Qëllimi i takimit është përgatitja e detyrimeve finale të takimit të radhës së SHSHPFA të Ballkanit, që do të zhvillohet në vendin tonë gjatë muajit maj si dhe ndjekja e zbatimi i detyrave që rrjedhin nga takimet paraardhëse të grupit koordinator dhe nëngrupeve të punës.
12 shkurt 2013
U zhvillua paraditen e sotme në mjediset e Qendrës së Kulturës, Medias dhe Botimeve të Mbrojtjes, konferenca me temë: “Forcat e Armatosura dhe Mjedisi”. Të pranishëm në këtë konferencë ishin ministri i Mbrojtjes, z. Arben Imami, shefi i Shtabit të Përgjithshëm të FA, gjeneralmajor Xhemal Gjunkshi, zëvendësministri i Mbrojtjes, z. Ekrem Spahiu, komandantët e forcave, etj.
Konferenca pati si qëllim sensibilizimin e Forcave të Armatosura për rëndësinë e sjelljes ndaj mjedisit në pajtim me standardet kombëtare, NATO dhe Bashkimit Europian, vlerësimin e gjendjes së mjedisit në strukturat e Forcave të Armatosura si dhe rekomandimet për përmirësimin e tij.
12 shkurt 2013
Është zhvilluar pasditen e djeshme në sallën e Kolegjiumit të Ministrisë së Mbrojtjes një takim vlerësues mbi konceptin e zhvillimit të Batalionit të Parë të Këmbësorisë së Forcës Tokësore. Në këtë takim merrnin pjesë ministri i Mbrojtjes, z. Arben Imami, shefi i Shtabit të Përgjithshëm të FA, gjeneralmajor Xhemal Gjunkshi, drejtoresha e Kabinetit të MM znj. Donika Çapi, zëvendësshefi i Shtabit të Përgjithshëm të FA, gjeneral brigade Sandër Lleshi, komandanti i Forcës Tokësore, gjeneralmajor Zyber Dushku si dhe drejtorë drejtorish në MM dhe SHPFA.
