22 maj 2013
Konferenca e 7-të e shefave të Shtabeve të Përgjithshëm të vendeve të Ballkanit në sesionin e dytë të saj ka vijuar me prezantimet e raporteve vjetore të grupit koordinator, nëngrupit të kërcënimeve asimetrike dhe nëngrupit të edukimit, trajnimit dhe stërvitjes. Gjatë prezantimeve, shefat e Shtabeve të Përgjithshëm të vendeve të Ballkanit janë njohur me ecurinë 1-vjeçare të aktiviteteve të realizuara nga strukturat përgjegjëse në Forcat e Armatosura të vendeve anëtare të iniciativës.
Gjatë sesionit të dytë, përfaqësuesit e vendeve anëtare të iniciativës së shefave të Shtabeve të Ballkanit, kanë informuar rreth kapaciteteve kombëtare në fushën e mbrojtjes të çdo vendi, me qëllim rritjen e bashkëpunimit në fushat ekzistuese, si dhe identifikimin e fushave të reja me interes reciprok.
22 maj 2013
Ka nisur sot, punimet nën drejtimin e shefit të Shtabit të Përgjithshëm të Forcave të Armatosura, gjeneralmajor Xhemal Gjunkshi, konferenca e 7-të e shefave të Shtabit të Përgjithshëm të vendeve të Ballkanit.
Në këtë konferencë të organizuar në ambientet e Hotel “Tirana Internacional” marrin pjesë shefat e Shtabit të Përgjithshëm të Forcave të Armatosura të Shqipërisë, Bosnje dhe Hercegovinës, Bullgarisë, Greqisë, Maqedonisë, Malit të Zi, Serbisë, Turqisë dhe Rumanisë. Gjithashtu, me statusin e të ftuarit marrin pjesë zëvendësshefat e Shtabit të Përgjithshëm të Kroacisë dhe Sllovenisë, si dhe përfaqësues të lartë të NATO dhe Bashkimit Europian.
21 maj 2013
Në datat 21-23 maj 2013, në vendin tonë do të zhvillohet Konferenca e 7-të e shefave të Shtabit të Përgjithshëm të vendeve të Ballkanit. Në këtë konferencë do të marrin pjesë shefat e Shtabit të Përgjithshëm të Forcave të Armatosura të Shqipërisë, Bosnje dhe Hercegovinës, Bullgarisë, Greqisë, Maqedonisë, Malit të Zi, Serbisë, Turqisë dhe Rumanisë. Gjithashtu, me statusin e të ftuarit do të marrin pjesë Shefat e Shtabit të Përgjithshëm të Kroacisë dhe Sllovenisë, si dhe përfaqësues të lartë të NATO dhe bashkimit Evropian.
Konferenca e drejtuesve më të lartë ushtarakë të vendeve të Ballkanit do të ketë në fokus thellimin e bashkëpunimit në fushën e mbrojtjes në çështje të arsimimit, komunikimit, luftës kundër terrorizmit, menaxhimit të informacionit, komunikimit satelitor dhe mbrojtjes kibernetike.
20 maj 2013
Sot paradite, shefi i Shtabit të Përgjithshëm i FA, gjeneralmajor Xhemal Gjunkshi mori pjesë në ceremoninë përmbyllëse të stërvitjes fushore “Rreth-Grethi ‘13”, në poligonin e Rreth-Grethit, Kavajë, me efektivat e batalionit të tretë të këmbësorisë, Poshnje. Qëllimi i stërvitjes 20 ditore është kompaktësimi në nivel skuadre, toge, kompanie dhe batalioni, duke synuar rritjen e nivelit operacional të strukturave të batalionit, si dhe aftësive profesionale të drejtuesve të stërvitjes. Të pranishëm në këtë ceremoni ishin komandanti i Forcës Tokësore, gjeneralmajor Zyber Dushku, përfaqësues të CUBIC, përfaqësues të pushtetit vendor, drejtorë drejtorish në SHP, etj. Ceremonia u hap nga komandanti i Forcës Tokësore, gjeneralmajor Zyber Dushku, i cili në fjalën e tij vlerësoi stërvitjen si prioritet të parë për të gjitha njësitë dhe repartet e Forcës Tokësore.
17 maj 2013
Sot paradite, Shefi i Shtabit të Përgjithshëm të FA, gjeneralmajor Xhemal Gjunkshi mori pjesë në Ditën e Vizitorëve të Shquar, me rastin e përmbylljes së stërvitjes “Biza ‘13”, në Poligonin Kombëtar të Bizës. Të pranishëm në këtë ceremoni përmbyllëse ishin edhe Komandantët e Forcave dhe të strukturave pjesëmarrëse, drejtorë drejtorish në MM dhe SHP. Në fjalën përshëndetëse të Stërvitjes “Biza ‘13”, Shefi i Shtabit të Përgjithshëm të FA, gjeneralmajor Gjunkshi shprehu rëndësinë e zhvillimit të kësaj stërvitje për Forcat e Armatosura, pasi në to dëshmohen aftësitë operacionale të strukturave dhe përgatitja shumë-planëshe për të realizuar detyrat e misionit.
15 maj 2013
Shefi i Shtabit të Përgjithshëm i FARSH, gjeneralmajor Xhemal Gjunkshi, sëbashku me shefat e Mbrojtjes së vendeve të NATO, kanë vijuar edhe gjatë ditës së sotme takimin e 169 të Komitetit Ushtarak të NATO, në Shtabin Qendror të NATO, në Bruksel. Në ditën e dytë, takimi i Komitetit Ushtarak të NATO, u fokusua në çështjet e transformimit të NATO, veçanërisht në implementimin e Forcave të Konektuara (Onnected Forces Initiative) dhe në “Mbrojtjen e Mençur” (Smart Defence). Gjithashtu, një vëmendje e veçantë në takim iu kushtua efektshmërisë së lartë për stërvitjet për vitin 2015, sidomos për NRF. Më tej, takimi ka vijuar me një përditësim për strukturën komanduese të NATO.
